Because of say you wan live big
For fear make them no laugh you
And make shame no catch you
,You con dey kill people for the sake of money Like fowls wey manage reach December.
Because of say you self wan feel among
And talk when people self dey talk
You con dey play people wayo
Turn them mumu and dry their pockets.
Because of say you wanna go abroad
And talk fast like those wey colonize your fathers
You join those bros wey dey inject cocaine
Spoil your life, disgrace your land.
Because of say you wan build house,
Make james and jamiu notice you.
You burst the pipe, drill the oil
And put people and your country for wahala.
Because of say you wan pass exams
And graduate quick with all your mates.
You sleep with all lecturers for you department
And get the A's in all the courses.
Because of say… O' Because of say.
..
Because of say...
..You forget your God!
Because of say… O' Because of say.
Because of say...
You forget say this life na turn by turn.
You forget say God no dey sleep.
Make we start to dey reason well na.
Because you never make am no mean say u no go still make am.
You don forget say no condition dey permanent?
You don forget say prayer dey make things happen?
No wish to be anybody for this life o.
Pray make God establish you.
The reason why most of us dey fail for this life na because we too dey copy other people but we forget say everybody get different question paper.
Udo diri unu
